पुणे: कोंढव्यातील शिवनेरी नगरमधील अनधिकृत बांधकामामुळे नागरिक त्रस्त; पालिकेच्या कारवाईकडे लक्ष
पुणे माझा न्युज । प्रतिनिधी: पुणे शहरातील कोंढवा परिसरातील शिवनेरी नगर, गल्ली नंबर १ येथे इकबाल बिल्डरच्या अनधिकृत बांधकामामुळे स्थानिक नागरिक त्रस्त झाले आहेत. या ठिकाणी अनधिकृत बांधकामाचे काम सुरू असून अवजड वाहनांची सतत ये-जा सुरू असल्याने परिसरातील लहान मुलांना मोठा धोका निर्माण झाला आहे. काही दिवसांपूर्वी याच परिसरात एक अपघातही घडला होता, ज्यामुळे नागरिकांमध्ये संताप आणि भीतीचे वातावरण आहे. तरीही पुणे महानगरपालिका (PMC) यावर कोणतीही ठोस कारवाई करत नसल्याने नागरिकांमध्ये नाराजी वाढत आहे. स्थानिकांनी लवकरात लवकर या अनधिकृत बांधकामावर कारवाईची मागणी केली आहे. आता याबाबत सविस्तर वृत्त...
कोंढव्यातील शिवनेरी नगर, गल्ली नंबर १ हा परिसर सध्या अनधिकृत बांधकामामुळे चर्चेत आहे. इकबाल बिल्डरद्वारे येथे बेकायदेशीर बांधकामे सुरू असल्याचा आरोप स्थानिक नागरिकांनी केला आहे. या बांधकामांमुळे परिसरातील रस्ते अरुंद झाले असून, अवजड वाहनांची सततची ये-जा लहान मुलांसह सर्व रहिवाशांसाठी धोकादायक ठरत आहे. येथील स्थानिक रहिवासी यांनी सांगितले,"गल्लीत अवजड वाहने येतात, ज्यामुळे मुलांना खेळताना किंवा रस्त्यावर चालताना धोका आहे. काही दिवसांपूर्वी येथे एक अपघातही झाला, पण तरीही पालिका कोणतीही कारवाई करत नाही."
या परिसरातील अनधिकृत बांधकामांचा प्रश्न नवीन नाही. यापूर्वीही कोंढव्यातील बेकायदेशीर बांधकामांबाबत अनेक तक्रारी समोर आल्या आहेत. फेब्रुवारी २०२५ मध्ये, कोंढव्यातील पोकळे मळा, पारगेनगर येथील सर्वे नंबर ३८/३/२ येथील अनधिकृत बांधकामाबाबत पुणे महानगरपालिकेच्या बांधकाम निरीक्षक मयूर इंगळे यांनी कोंढवा पोलीस ठाण्यात तक्रार नोंदवली होती. त्यानुसार, अलीम अब्दुल शेख, मोहतशीम जुनेद शेख, आणि निझाम शेख यांच्याविरुद्ध महाराष्ट्र प्रादेशिक नियोजन व नगररचना अधिनियम (MRTP Act), १९६६ अंतर्गत गुन्हा दाखल झाला होता. मात्र, असे असूनही, शिवनेरी नगर मधील अनधिकृत बांधकामांवर अद्याप कोणतीही ठोस कारवाई झालेली नाही, असा स्थानिकांचा आरोप आहे.
स्थानिक रहिवासी यांनी याबाबत आपली खंत व्यक्त केली. नागरिकांचे म्हणणे आहे कि, "आम्ही पालिकेकडे अनेकदा तक्रारी केल्या, पण प्रत्येक वेळी आम्हाला आश्वासने मिळतात. कारवाई कधी होणार? या बांधकामांमुळे आमच्या मुलांचे जीव धोक्यात आहेत."या परिसरात अवजड वाहनांमुळे धूळ आणि प्रदूषण वाढले आहे, ज्यामुळे रहिवाशांच्या आरोग्यावरही परिणाम होत आहे. विशेषतः, गल्लीतील अरुंद रस्त्यांमुळे वाहतूक कोंडी आणि अपघातांचा धोका वाढला आहे.
आमच्या प्रतिनिधीने पुणे महानगरपालिकेच्या बांधकाम परवानगी आणि अनधिकृत बांधकाम नियंत्रण विभागाकडे याबाबत विचारणा केली असता, त्यांनी कारवाईसाठी योग्य तपासणी करून कारवाई करण्याचे आश्वासन दिले आहे. मात्र, स्थानिकांचा आरोप आहे की, काही प्रभावशाली बिल्डरांमुळे पालिका कारवाई टाळत आहे. यापूर्वी पिंपरी-चिंचवड महानगरपालिकेने कुदळवाडी येथील अनधिकृत बांधकामांवर कठोर कारवाई केली होती, ज्यामध्ये १८ लाख चौरस फूट बांधकाम जमीनदोस्त करण्यात आले होते. याउलट, कोंढव्यातील कारवाईचा अभाव नागरिकांमध्ये संतापाचे कारण ठरत आहे. अशीच कारवाई कोंढव्यात होण्याची शक्यता नाकारता येऊ शकत नाही
याबाबत पालिका आयुक्त आणि कोंढवा पोलीस ठाण्याकडे लेखी तक्रारी दाखल केल्या आहेत. नागरिकांनी मागणी केली आहे की, लवकरात लवकर या अनधिकृत बांधकामांवर कारवाई करून परिसरातील रस्ते मोकळे करावेत आणि अवजड वाहनांवर निर्बंध घालावेत. येथील प्रश्नांवर आम्ही लवकरच याबाबत पालिका आयुक्तांशी चर्चा करणार आहोत. लहान मुलांच्या सुरक्षेसाठी आणि परिसरातील नागरी सुविधांसाठी तातडीने पावले उचलणे गरजेचे आहे. याबाबत पुढील अपडेट्ससाठी आमच्याशी जोडलेले रहा.
कोणत्याही टिप्पण्या नाहीत:
टिप्पणी पोस्ट करा